ଖଡ଼ଗନଦୀରେ ଡଙ୍ଗା ବୁଡ଼ି ଶଶୁର-ବୋହୁ ନିଖୋଜ

ବାଲିଗୁଡ଼ା, ୨୬/୦୮: ସୁକାନ୍ତ କୁମାର ତ୍ରିପାଠୀ

କନ୍ଧମାଳ ଜିଲ୍ଲା ବାଲିଗୁଡ଼ା ଥାନା ଅନ୍ତର୍ଗତ ସଲାଗୁଡ଼ା ପଞ୍ଚାୟତର ଦୁର୍ଗମ ଡାକା ଗାଁ ନିକଟ ଖଡ଼ଗନଦୀରେ ଡଙ୍ଗା ବୁଡ଼ି ଶଶୁର ଓ ବୋହୁ ନିଖୋଜ ହୋଇଥିବା ବେଳେ ୬ ଜଣ ଉଦ୍ଧାର ହୋଇଛନ୍ତି।ସୂଚନା ଅନୁସାରେ, ଡାକା ଗାଁରେ ଏକ ଶୁଦ୍ଧିକ୍ରିୟା କାର୍ଯ୍ୟକ୍ରମରେ ଯୋଗଦେବା ପାଇଁ କିଛି ସମ୍ପର୍କୀୟ ଆସିଥିଲେ। ପରେ ନଦୀ ଆରପାରିରେ ଥିବା ମାମୁଁ ଘରକୁ ଯାଇ ଅପରାହ୍ନ ସମୟରେ ୮ ଜଣ ଡଙ୍ଗା ଯୋଗେ ଫେରୁଥିବା ବେଳେ ହଠାତ୍ ଡଙ୍ଗାଟି ଭାରସାମ୍ୟ ହରାଇ ଖଡ଼ଗନଦୀରେ ବୁଡ଼ି ଯାଇଥିଲା।ଏହି

ଅଘଟଣରେ ୬ ଜଣ ନଦୀରୁ ଉଦ୍ଧାର ହୋଇଥିବା ବେଳେ ଦୁଇ ଜଣ ପ୍ରଖର ସ୍ରୋତରେ ଭାସି ନିଖୋଜ ହୋଇଯାଇଛନ୍ତି। ନିଖୋଜଙ୍କ ମଧ୍ୟରେ ସୁତ୍ରା ପଞ୍ଚାୟତ ପଲାମି ଗାଁର ଗୁନ୍ଦନା ମଲିକ ଓ ତାଙ୍କ ବୋହୁ ରାଇଙ୍ଗି ମଲିକ ଥିବା ଜଣାପଡ଼ିଛି।ଖବର ପାଇ ବାଲିଗୁଡ଼ା ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଖୋଜଙ୍କୁ ଖୋଜିବା ପାଇଁ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ତେବେ ପ୍ରଖର ଜଳସ୍ରୋତ ଯୋଗୁଁ

ଏପର୍ଯ୍ୟନ୍ତ ନିଖୋଜ ଦୁଇ ଜଣଙ୍କ କୌଣସି ସନ୍ଧାନ ମିଳିପାରିନାହିଁ।ବର୍ତ୍ତମାନ ଲଘୁଚାପଜନିତ ବର୍ଷା ଲାଗି ରହିଥିବାରୁ ଖଡ଼ଗନଦୀର ଜଳସ୍ତର ବୃଦ୍ଧି ପାଇବା ସହ ସ୍ରୋତ ମଧ୍ୟ ପ୍ରଖର ରହିଛି। ଏହା ସତ୍ତ୍ୱେ ଅଗ୍ନିଶମ ବାହିନୀ, ପରିବାର ଓ ସମ୍ପର୍କୀୟମାନେ ନିଖୋଜ ଦୁଇ ଜଣଙ୍କୁ ଖୋଜିବା ପାଇଁ ଉଦ୍ଧାର କାର୍ଯ୍ୟ ଜାରି ରଖିଥିବା ଜଣାପଡ଼ିଛି।