ଗଞ୍ଜେଇ ଚାଷ ବିରୋଧରେ କନ୍ଧମାଳ ପୁଲିସର ବଡ଼ ଅଭିଯାନ: ୩ ଅଭିଯୁକ୍ତ ଗିରଫ, ୩୦ ଏକର ଗଞ୍ଜେଇ ଚାଷ ନଷ୍ଟ : ଶୂନ୍ୟ ଗଞ୍ଜେଇ ଚାଷ ଲକ୍ଷ୍ୟରେ ପୁଲିସର କଡ଼ା ପଦକ୍ଷେପ
ବାଲିଗୁଡ଼ା,୧୧/୧୦: ସୁକାନ୍ତ କୁମାର ତ୍ରିପାଠୀ କନ୍ଧମାଳ ଜିଲ୍ଲାରେ ବେଆଇନ ଗଞ୍ଜେଇ ଚାଷକୁ ସମ୍ପୂର୍ଣ୍ଣ ମୂଳପୋଛ କରିବା ଲକ୍ଷ୍ୟରେ ପୁଲିସ ପକ୍ଷରୁ ଆରମ୍ଭ ହୋଇଛି ସ୍ୱତନ୍ତ୍ର ଅଭିଯାନ। ଏହି ଅଭିଯାନରେ ପ୍ରାୟ ୩୦ ଏକର ଜମିରେ ହୋଇଥିବା ବେଆଇନ ଗଞ୍ଜେଇ ଚାଷକୁ ନଷ୍ଟ କରାଯିବା ସହ ଏଥିରେ ସମ୍ପୃକ୍ତ ତିନି ଜଣ ଅଭିଯୁକ୍ତଙ୍କୁ ପୁଲିସ ଗିରଫ କରିଛି।ପୁଲିସର ପ୍ରେସ୍ ବିଜ୍ଞପ୍ତି ଅନୁଯାୟୀ, ଅକ୍ଟୋବର ୯ ଓ ୧୦ ତାରିଖରେ କନ୍ଧମାଳ ଜିଲ୍ଲାରେ ‘ମିଶନ ଜିରୋ କ୍ୟାନାବିସ୍ କଲ୍ଟିଭେସନ୍’ ଅଭିଯାନ ଆରମ୍ଭ ହୋଇଥିଲା। ଏହି ଅଭିଯାନକୁ ଏଏନ୍ଟିଏଫ୍ ଆଇଜି ହିମାଂଶୁ ଲାଲ ଓ ଡିଆଇଜି କନୱର ବିଶାଲ ସିଂହଙ୍କ ଉପସ୍ଥିତିରେ ଶୁଭାରମ୍ଭ କରାଯାଇଥିଲା। ଚଳିତ ୨୦୨୬-୨୭ ଚାଷ ଋତୁରେ ବେଆଇନ ଗଞ୍ଜେଇ ଚାଷ ନଷ୍ଟ କରିବାକୁ ପୁଲିସ ପକ୍ଷରୁ ଜୋରଦାର ପଦକ୍ଷେପ ନିଆଯାଉଛି।ସଦର ଥାନା ଅନ୍ତର୍ଗତ ବିଲାବାଡ଼ି ଗ୍ରାମପଞ୍ଚାୟତର କାକେନ୍ଦ୍ରୀ ଗ୍ରାମ ନିକଟସ୍ଥ ଜଙ୍ଗଲ ଅଞ୍ଚଳରେ ବ୍ୟାପକ ପରିମାଣରେ ବାଣିଜ୍ୟିକ
ଉଦ୍ଦେଶ୍ୟରେ ଗଞ୍ଜେଇ ଚାଷ ହେଉଥିବା ସୂଚନା ପାଇ ପୁଲିସ ଏକ ବଡ଼ ଧରଣର ଚଢ଼ାଉ କରିଥିଲା। ସଦର ଏସ୍ଡିପିଓ ପି.ପି. ସୁଭ୍ରଜିତ ବିଶ୍ୱାଳ ଓ ସଦର ଥାନାର ଏସ୍ଆଇ ସମ୍ବିତ ବେହେରାଙ୍କ ନେତୃତ୍ୱରେ ଗଠିତ ପୁଲିସ ଟିମ୍ ଏସ୍ପି ରମେନ୍ଦ୍ର ପ୍ରସାଦଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏହି ଅଭିଯାନ ଚଳାଇଥିଲା।ଚଢ଼ାଉ ସମୟରେ ଯୋଜନାବଦ୍ଧ ଭାବେ ଜଳସେଚନ ଓ ସାର ପ୍ରୟୋଗ କରି ଗଞ୍ଜେଇ ଚାଷ କରାଯାଇଥିବା ଦେଖିବାକୁ ମିଳିଥିଲା। ପୁଲିସ ଘଟଣାସ୍ଥଳରୁ ପଞ୍ଚାଳ ବେହେରା (୫୫), ବିନାୟକ ବେହେରା (୩୬) ଓ ପ୍ରଭାତ କୁମାର ବେହେରା (୩୦)ଙ୍କୁ ଗିରଫ କରିଛି। ଏହି ତିନି ଜଣ କାକେନ୍ଦ୍ରୀ ଗ୍ରାମର ବାସିନ୍ଦା ବୋଲି ପ୍ରେସ୍ ବିଜ୍ଞପ୍ତିରେ ଉଲ୍ଲେଖ ରହିଛି।ଅଭିଯାନ ସମୟରେ ଆଇନଗତ ପ୍ରକ୍ରିୟା
ଅନୁସାରେ ଗଞ୍ଜେଇ ଗଛ ନଷ୍ଟ କରାଯିବା ସହ ଆବଶ୍ୟକ ନମୁନା ସଂଗ୍ରହ କରାଯାଇଛି। ସମଗ୍ର ପ୍ରକ୍ରିୟାର ଫଟୋଗ୍ରାଫି ଓ ଭିଡିଓଗ୍ରାଫି ମାଧ୍ୟମରେ ରେକର୍ଡ ରଖାଯାଇଛି। ଏହି ଘଟଣାରେ ସଦର ଥାନାରେ କେସ୍ ନମ୍ବର ୨୧୯, ତାରିଖ ୧୦/୧୦/୨୦୨୬ରେ ଏନ୍ଡିପିଏସ୍ ଆଇନର ଧାରା ୨୦(ଏ)(i) ଅନୁଯାୟୀ ମାମଲା ରୁଜୁ ହୋଇଛି।କନ୍ଧମାଳ ଜିଲ୍ଲାରେ ବେଆଇନ ଗଞ୍ଜେଇ ଚାଷକୁ ରୋକିବା ଏବଂ ଏହାର ଚୋରା କାରବାର ଉପରେ ଅଙ୍କୁଶ ଲଗାଇବା ପାଇଁ ଆଗାମୀ ଦିନରେ ମଧ୍ୟ ଏଭଳି ଅଭିଯାନ ଜାରି ରହିବ ବୋଲି ପୁଲିସ ପକ୍ଷରୁ ସ୍ପଷ୍ଟ କରାଯାଇଛି।ଶିରୋନାମାକୁ ସଂକ୍ଷିପ୍ତ କରନ୍ତୁ
