ମିଗୁନପଦରରେ ବିଏସଏଫ୍ ପକ୍ଷରୁ ସ୍ୱାଧୀନତା ଦିବସ ପାଳନ
ବାଲିଗୁଡ଼ା, ୧୪/୦୮: ସୁକାନ୍ତ କୁମାର ତ୍ରିପାଠୀ
ସ୍ୱାଧୀନତା ଦିବସ-୨୦୨୬ ଅବସରରେ ‘ବନ୍ଦେ ମାତରମ୍’ ଓ ‘ହର ଘର ତ୍ରିରଙ୍ଗା’ ବିଷୟବସ୍ତୁକୁ ନେଇ ୧୩୬ ବାଟାଲିୟନ୍ ବିଏସଏଫ୍ର ‘ବି’ କମ୍ପାନୀ, ମିଗୁନପଦର ସିଓବି ପକ୍ଷରୁ ବିଭିନ୍ନ କାର୍ଯ୍ୟକ୍ରମ ଆୟୋଜିତ ହୋଇଛି।୧୪ ଅଗଷ୍ଟରେ ସକାଳ ୧୦ଟା ୩୦ରୁ ଅପରାହ୍ନ ୨ଟା ୪୫ ପର୍ଯ୍ୟନ୍ତ ମିଗୁନପଦର ମାଧ୍ୟମିକ ବିଦ୍ୟାଳୟ ଓ ସୋଲପଡ଼ା ପ୍ରାଥମିକ ବିଦ୍ୟାଳୟରେ ଏହି କାର୍ଯ୍ୟକ୍ରମ ହୋଇଥିଲା। ଏହି ଅବସରରେ ଛାତ୍ରଛାତ୍ରୀଙ୍କୁ ସୀମା ସୁରକ୍ଷା ବାହିନୀର କାର୍ଯ୍ୟ ଓ ଭୂମିକା ସମ୍ପର୍କିତ ଏକ ସଂକ୍ଷିପ୍ତ ଭିଡିଓ ପ୍ରଦର୍ଶିତ କରାଯାଇଥିଲା।ପରେ ବିଦ୍ୟାଳୟର ଛାତ୍ରଛାତ୍ରୀଙ୍କ ସହ ବିଏସଏଫ୍ ଯବାନମାନେ ଜାତୀୟ ସଙ୍ଗୀତ ‘ଜନ ଗଣ ମନ’ ଓ ଦେଶାତ୍ମବୋଧକ ସଙ୍ଗୀତ ‘ବନ୍ଦେ ମାତରମ୍’ ଗାନ କରିଥିଲେ। ଏଥିସହ
ଛାତ୍ରଛାତ୍ରୀଙ୍କ ମଧ୍ୟରେ ଚିତ୍ରାଙ୍କନ ପ୍ରତିଯୋଗିତା ମଧ୍ୟ ଆୟୋଜିତ ହୋଇଥିଲା।ମିଗୁନପଦର ମାଧ୍ୟମିକ ବିଦ୍ୟାଳୟର ପ୍ରଧାନଶିକ୍ଷକ ସୁଧୀର ବେହେରାଙ୍କ ସମେତ ୫ ଜଣ କର୍ମଚାରୀ ଓ ୨୮ ଜଣ ଛାତ୍ରଛାତ୍ରୀ ଏବଂ ସୋଲପଡ଼ା ପ୍ରାଥମିକ ବିଦ୍ୟାଳୟର ବିଟ୍ଟୁ ମଲିକଙ୍କ ସମେତ ୫ ଜଣ କର୍ମଚାରୀ ଓ ୨୬ ଜଣ ଛାତ୍ରଛାତ୍ରୀ ଏଥିରେ ଯୋଗ ଦେଇଥିଲେ।ବିଏସଏଫ୍ ପକ୍ଷରୁ ଏସି ନିର୍ମଳ ଚନ୍ଦ୍ର ଦାସଙ୍କ ନେତୃତ୍ୱରେ ୨ ଜଣ ଏସଓ ଓ ଅନ୍ୟ ୧୬ ଜଣ ଯବାନଙ୍କ ସମେତ ମୋଟ ୧୯ ଜଣ ଅଂଶଗ୍ରହଣ କରିଥିଲେ। ଏହି କାର୍ଯ୍ୟକ୍ରମ ମାଧ୍ୟମରେ ଛାତ୍ରଛାତ୍ରୀଙ୍କ ମନରେ ଦେଶପ୍ରେମ ଓ ଜାତୀୟତାବୋଧ ସୃଷ୍ଟି କରିବା ସହ ‘ହର ଘର ତ୍ରିରଙ୍ଗା’ ବାର୍ତ୍ତାକୁ ଲୋକଙ୍କ ନିକଟରେ ପହଞ୍ଚାଇବାର ପ୍ରୟାସ କରାଯାଇଥିଲା।
