ଥିଲେ ଦିଅ, ନଥିଲେ ନିଅ: ବାଲିଗୁଡ଼ାରେ ମାନବିକତାର ନିଆରା ପ୍ରୟାସ
ବାଲିଗୁଡ଼ା, ୦୭/୧୧: ସୁକାନ୍ତ କୁମାର ତ୍ରିପାଠୀ : ମଣିଷ ମଣିଷର ସହାୟତାରେ ହିଁ ସମାଜରେ ମାନବିକତା ବଞ୍ଚି ରହେ। ଏହି ମହତ୍ ଚିନ୍ତାଧାରାକୁ ଆଧାର କରି ବାଲିଗୁଡ଼ାରେ ଏକ ନିଆରା ସାମାଜିକ ସେବା କାର୍ଯ୍ୟକ୍ରମ ‘ଥିଲେ ଦିଅ, ନଥିଲେ ନିଅ’ ସଫଳତାର ସହ ଆୟୋଜିତ ହୋଇଯାଇଛି। ଶନିବାର ବାଲିଗୁଡ଼ାସ୍ଥିତ ତ୍ରିବେଣୀ ପାର୍କ ସମ୍ମୁଖରେ Senior Age Health Care Association, Balliguda ପକ୍ଷରୁ ଏହି ଜନହିତକର କାର୍ଯ୍ୟକ୍ରମ ଆୟୋଜନ କରାଯାଇଥିଲା।ବାଲିଗୁଡ଼ାର ସାପ୍ତାହିକ ହାଟ ଦିବସ ହୋଇଥିବାରୁ ଏହି କାର୍ଯ୍ୟକ୍ରମରେ ସହରବାସୀଙ୍କ ସମେତ ଆଖପାଖ ଅଞ୍ଚଳର ବହୁ ଲୋକ ସାମିଲ ହୋଇଥିଲେ। ଅନାବଶ୍ୟକ ହୋଇ ପଡ଼ିରହିଥିବା ବ୍ୟବହାରଯୋଗ୍ୟ ପୋଷାକ ଓ ଅନ୍ୟାନ୍ୟ ସାମଗ୍ରୀ ଦାନ କରିବା ସହ ଆବଶ୍ୟକତା ଥିବା ଲୋକଙ୍କୁ ସେଗୁଡ଼ିକ ମାଗଣାରେ ନେବାର ସୁଯୋଗ ଦିଆଯାଇଥିଲା।କାର୍ଯ୍ୟକ୍ରମର ଉଦ୍ଘାଟନ ପାଇଁ ବାଲିଗୁଡ଼ାର ଉପଜିଲ୍ଲାପାଳଙ୍କୁ ମୁଖ୍ୟ ଅତିଥି ଭାବେ ଆମନ୍ତ୍ରଣ କରାଯାଇଥିଲା। ଏଥିସହ ଡେପୁଟି କଲେକ୍ଟର, ବାଲିଗୁଡ଼ା ଏନ୍ଏସିର କାର୍ଯ୍ୟନିର୍ବାହୀ ଅଧିକାରୀ ଏବଂ ଏନ୍ଏସି ଅଧ୍ୟକ୍ଷ ଉପସ୍ଥିତ ରହି ଆୟୋଜକ ସଂଘର ଏହି ମହତ୍ ପଦକ୍ଷେପକୁ ପ୍ରଶଂସା କରିଥିଲେ।ଏହି ଅଭିନବ ପ୍ରୟାସର ମୁଖ୍ୟ ଲକ୍ଷ୍ୟ ହେଉଛି ସମାଜରେ ଥିବା ଅଭାବୀ ଓ ଆବଶ୍ୟକତା
ଥିବା ଲୋକଙ୍କୁ ସହାୟତାର ହାତ ବଢ଼ାଇବା। ଯେଉଁମାନଙ୍କ ପାଖରେ ଅତିରିକ୍ତ ବ୍ୟବହାରଯୋଗ୍ୟ ପୋଷାକ ଓ ଅନ୍ୟାନ୍ୟ ସାମଗ୍ରୀ ରହିଛି, ସେମାନେ ଦାନ କରିପାରିବେ। ଅନ୍ୟପକ୍ଷରେ ଯେଉଁମାନଙ୍କୁ ସେହି ସାମଗ୍ରୀର ଆବଶ୍ୟକତା ରହିଛି, ସେମାନେ ନିଜ ପସନ୍ଦ ଓ ଆବଶ୍ୟକତା ଅନୁଯାୟୀ ମାଗଣାରେ ନେଇପାରିବେ। ଏହାଦ୍ୱାରା ଅପଚୟ ରୋକିବା ସହ ପରସ୍ପର ମଧ୍ୟରେ ସହଯୋଗ, ସମ୍ବେଦନଶୀଳତା ଓ ଭାଇଚାରାର ଭାବନା ବୃଦ୍ଧି ପାଇବ।ସଂଘର ସମସ୍ତ ସଦସ୍ୟ ଓ ସଦସ୍ୟାଙ୍କ ନିଷ୍ଠାପର ଉଦ୍ୟମ ଏବଂ ସାଧାରଣ ଲୋକଙ୍କ ସ୍ୱତଃସ୍ଫୂର୍ତ୍ତ ସହଯୋଗ ଯୋଗୁଁ କାର୍ଯ୍ୟକ୍ରମଟି ସଫଳ ହୋଇଥିଲା। ଉଲ୍ଲେଖଯୋଗ୍ୟ ଯେ, ସଂଘ ପକ୍ଷରୁ ଏହିଭଳି ସେବା କାର୍ଯ୍ୟକ୍ରମ ତୃତୀୟ ଥର ପାଇଁ ଆୟୋଜନ କରାଯାଇଛି। ପୂର୍ବରୁ ମଧ୍ୟ ଏଭଳି ପଦକ୍ଷେପ ମାଧ୍ୟମରେ ସମାଜକୁ ମାନବିକତା ଓ ପରୋପକାରର ବାର୍ତ୍ତା ଦିଆଯାଇଛି।ସଂଘର ଆହ୍ୱାନ: ଅନାବଶ୍ୟକ ସାମଗ୍ରୀକୁ ଅପଚୟ ନକରି ଆବଶ୍ୟକତା ଥିବା ଲୋକଙ୍କୁ ଦିଅନ୍ତୁ। ଆପଣଙ୍କର ଛୋଟିଆ ସହଯୋଗ ଅନ୍ୟ ଜଣଙ୍କ ମୁହଁରେ ହସ ଫୁଟାଇପାରେ।ଏଭଳି ମହତ୍ ପ୍ରୟାସ ମାଧ୍ୟମରେ ବାଲିଗୁଡ଼ାରେ ସେବା, ସହଯୋଗ ଓ ମାନବିକତାର ଏକ ସୁନ୍ଦର ଉଦାହରଣ ସୃଷ୍ଟି ହୋଇଛି।
