ବାଲିଗୁଡ଼ାରେ ରକ୍ଷା ବନ୍ଧନ ପାଳିତ, BSF ଯବାନଙ୍କୁ ରାଖୀ ବାନ୍ଧିଲେ ଶିକ୍ଷା ନିକେତନ ସ୍କୁଲ ଛାତ୍ରଛାତ୍ରୀ
ବାଲିଗୁଡ଼ା, ୨୭/୦୮: ସୁକାନ୍ତ କୁମାର ତ୍ରିପାଠୀ
ଭାଇ-ଭଉଣୀଙ୍କ ମଧ୍ୟରେ ଥିବା ନିବିଡ଼ ସ୍ନେହ, ଭଲପାଇବା, ବିଶ୍ୱାସ ଓ ପାରସ୍ପରିକ ଦାୟିତ୍ୱର ପ୍ରତୀକ ପବିତ୍ର ରକ୍ଷା ବନ୍ଧନ ପର୍ବ ବାଲିଗୁଡ଼ାରେ ଉତ୍ସାହ ଓ ଆନନ୍ଦର ସହ ପାଳିତ ହୋଇଯାଇଛି। ଏହି ଅବସରରେ ବାଲିଗୁଡ଼ା ଶିକ୍ଷା ନିକେତନ ସ୍କୁଲର ଛାତ୍ରଛାତ୍ରୀମାନେ BSF CAMPରେ ପହଞ୍ଚି ସେଠାରେ ନିୟୋଜିତ BSF ଯବାନମାନଙ୍କ ହାତରେ ରାଖୀ ବାନ୍ଧିଥିଲେ।ଦେଶର ସୁରକ୍ଷା ପାଇଁ ଘର ପରିବାରଠାରୁ
ଦୂରରେ ରହି କର୍ତ୍ତବ୍ୟରତ ଯବାନମାନଙ୍କ ସହ ରକ୍ଷା ବନ୍ଧନ ପାଳନ କରି ଛାତ୍ରଛାତ୍ରୀମାନେ ସେମାନଙ୍କ ପ୍ରତି ସମ୍ମାନ ଓ ସ୍ନେହ ପ୍ରକାଶ କରିଥିଲେ। ଯବାନମାନେ ମଧ୍ୟ ଛାତ୍ରଛାତ୍ରୀଙ୍କ ଏହି ଭାବପୂର୍ଣ୍ଣ ପଦକ୍ଷେପକୁ ସ୍ୱାଗତ କରିଥିଲେ।ରକ୍ଷା ବନ୍ଧନ କେବଳ ଏକ ସୂତାର ବନ୍ଧନ ନୁହେଁ, ବରଂ ଭାଇ-ଭଉଣୀଙ୍କ ମଧ୍ୟରେ ଥିବା ସ୍ନେହ, ବିଶ୍ୱାସ, ସୁରକ୍ଷା ଓ ପାରିବାରିକ ସମ୍ପର୍କର ଏକ ପବିତ୍ର ପ୍ରତୀକ। ଏହି ପର୍ବ ପରିବାରରେ ସ୍ନେହ ଓ ଏକତା ବଢ଼ାଇବା ସହ ସମାଜରେ ପରସ୍ପର ସହଯୋଗ, ସମ୍ମାନ ଓ ଭାଇଚାରାର ଭାବନାକୁ ମଜବୁତ କରିଥାଏ।ଆଧୁନିକ ସମାଜରେ ମଧ୍ୟ ରକ୍ଷା ବନ୍ଧନର ଏହି ମହାନ ମୂଲ୍ୟବୋଧକୁ ଆଗକୁ ନେବା ଆବଶ୍ୟକ ବୋଲି ଏହି ଅବସରରେ ମତ ପ୍ରକାଶ ପାଇଥିଲା। BSF ଯବାନଙ୍କ ସହ ଛାତ୍ରଛାତ୍ରୀଙ୍କ ଏହି ରକ୍ଷା ବନ୍ଧନ ପାଳନ କାର୍ଯ୍ୟକ୍ରମ ସ୍ଥାନୀୟ ଅଞ୍ଚଳରେ ଭାଇଚାରା, ଦେଶପ୍ରେମ ଓ ସଦ୍ଭାବନାର ବାର୍ତ୍ତା ପ୍ରଦାନ କରିଥିଲା।
