ବନ ବିଭାଗର ମିଳିତ ଚଢ଼ାଉ: ଟ୍ରକ୍ରୁ ବିପୁଳ ପରିମାଣର ଶାଳ କାଠ ଜବତ, ଜଣେ ଅଟକ
ବାଲିଗୁଡ଼ା, ୨୦/୧୦ (ସୁକାନ୍ତ କୁମାର ତ୍ରିପାଠୀ): ଜଙ୍ଗଲରୁ ମୂଲ୍ୟବାନ କାଠ କାଟି ଚୋରା ଚାଲାଣ କରୁଥିବା ମାଫିଆଙ୍କ ଉପରେ ବନ ବିଭାଗର କଡ଼ା ନଜର। କନ୍ଧମାଳ ଜିଲ୍ଲାରେ ବନ ବିଭାଗର ଏକ ମିଳିତ ଚଢ଼ାଉରେ ପାଲ ଘୋଡ଼ା ହୋଇଥିବା ଏକ ଟ୍ରକ୍ରୁ ବିପୁଳ ପରିମାଣର ମୂଲ୍ୟବାନ ଶାଳ କାଠ ଜବତ କରାଯାଇଛି। ଏହି ଘଟଣାରେ ଜଣେ ବ୍ୟକ୍ତିଙ୍କୁ ଅଟକ ରଖାଯାଇଥିବାବେଳେ ଚୋରା କାଠ କାରବାରର ଉତ୍ସ ଖୋଜିବା ପାଇଁ ତଦନ୍ତ ଜୋରଦାର କରାଯାଇଛି।ସୂଚନା ଅନୁଯାୟୀ, ଦାରିଙ୍ଗବାଡ଼ି ବନାଞ୍ଚଳ ଅନ୍ତର୍ଗତ ସିମନବାଡ଼ି ଉପବିଭାଗ ଏବଂ କ. ନୂଆଗାଁ ବନାଞ୍ଚଳର କର୍ମଚାରୀମାନେ ମିଳିତ ଭାବେ ଏହି ଚଢ଼ାଉ କରିଥିଲେ। ଜାତୀୟ ରାଜପଥ ୫୯ରେ ସିମନବାଡ଼ିଠାରୁ କଞ୍ଜାମେଣ୍ଡି ଛକ ମଧ୍ୟରେ ଓଡ଼ି-୦୫-ବିଜେ-୪୭୭୪ ନମ୍ବର ବିଶିଷ୍ଟ ଏକ ଟ୍ରକ୍କୁ ଅଟକାଇ ଯାଞ୍ଚ କରାଯାଇଥିଲା। ଯାଞ୍ଚ ସମୟରେ ଟ୍ରକ୍ରେ ବହୁ ପରିମାଣର ଶାଳ କାଠ ଗଣ୍ଡି ବୋଝେଇ ହୋଇଥିବା ଜଣାପଡ଼ିଥିଲା। କାଠଗୁଡ଼ିକୁ ପାଲ ଘୋଡ଼ାଇ ରଖାଯାଇଥିବାରୁ ଏହା ଚୋରା ଚାଲାଣ ପାଇଁ ଉଦ୍ଦିଷ୍ଟ ଥିବା ସନ୍ଦେହ କରାଯାଉଛି।ଚୋରା କାଠ ଚାଲାଣ ସମ୍ପର୍କରେ ଖବର ପାଇବା ପରେ ଦୁଇ ବନାଞ୍ଚଳର କର୍ମଚାରୀମାନେ ମିଳିତ ଅଭିଯାନ ଚଳାଇ ଟ୍ରକ୍ ସହ କାଠ ଜବତ କରିଥିଲେ। ଏଥିସହ ଜଣେ ବ୍ୟକ୍ତିଙ୍କୁ ଅଟକ ରଖି ଘଟଣାର ବିଭିନ୍ନ ଦିଗ ଉପରେ ପଚରାଉଚରା କରାଯାଉଛି।ବନାଞ୍ଚଳ ଅଧିକାରୀ ଲକ୍ଷ୍ମୀନାରାୟଣ ପଣ୍ଡାଙ୍କ ସୂଚନା ଅନୁସାରେ, ଜବତ ଶାଳ କାଠର ମୂଲ୍ୟ ଲକ୍ଷାଧିକ ଟଙ୍କା ହେବ ବୋଲି ପ୍ରାଥମିକ ଆକଳନ କରାଯାଉଛି। ତେବେ କାଠର ପ୍ରକୃତ ପରିମାଣ ଓ ମୂଲ୍ୟ ଏଯାବତ୍ ନିର୍ଦ୍ଧାରଣ ହୋଇନାହିଁ। ସିମନବାଡ଼ି ଉପବିଭାଗର ବନପାଳ ବନିତା ପ୍ରଧାନ ଜବତ କାଠର ପରିମାଣ ଓ ମୂଲ୍ୟ ଆକଳନ କରୁଛନ୍ତି।କେଉଁ ଜଙ୍ଗଲରୁ ଶାଳ କାଠ କଟାଯାଇଥିଲା, ଏହାକୁ କେଉଁ ସ୍ଥାନକୁ ଚାଲାଣ କରାଯାଉଥିଲା ଏବଂ ଏହି କାରବାରରେ ଆଉ କେଉଁମାନେ ସମ୍ପୃକ୍ତ ଅଛନ୍ତି, ସେନେଇ ବନ ବିଭାଗ ତଦନ୍ତ ଜାରି ରଖିଛି। ଅଟକ ବ୍ୟକ୍ତିଙ୍କୁ ପଚରାଉଚରା ପରେ ଚୋରା କାଠ କାରବାର ସମ୍ପର୍କରେ ଅଧିକ ତଥ୍ୟ ମିଳିବା ଆଶା କରାଯାଉଛି।ଜଙ୍ଗଲ ସମ୍ପଦର ସୁରକ୍ଷା ଏବଂ କାଠ ଚୋରା ଚାଲାଣ ରୋକିବା ପାଇଁ ବନ ବିଭାଗର ଏହି ପଦକ୍ଷେପକୁ ଗୁରୁତ୍ୱପୂର୍ଣ୍ଣ ବୋଲି ମନେ କରାଯାଉଛି। ତେବେ ଏହି ଘଟଣା ପଛରେ ଥିବା ଚୋରା କାଠ କାରବାରର ପୂରା ନେଟ୍ୱର୍କର ପର୍ଦ୍ଦାଫାସ କେବେ ହେବ, ତାହା ଏବେ ତଦନ୍ତର ମୁଖ୍ୟ ବିଷୟ ପାଲଟିଛି।
