ଖୋର୍ଦ୍ଧା ରୋଡ୍ ମଣ୍ଡଳ ରେଳ ହସ୍ପିଟାଲରେ ବିଶ୍ୱ ସ୍ୱାସ୍ଥ୍ୟ ଦିବସ ପାଳିତ
ଖୋର୍ଦ୍ଧା,(ସଞ୍ଜୀବ କୁମାର):-
ଖୋର୍ଦ୍ଧା ରୋଡ୍ ମଣ୍ଡଳ ସ୍ଥିତ ରେଳ ହସ୍ପିଟାଲରେ “ସ୍ୱାସ୍ଥ୍ୟ ପାଇଁ ଏକାଠି: ବିଜ୍ଞାନ ସହିତ ଠିଆ ହେବା” ଆଧାରରେ ବିଶ୍ୱ ସ୍ୱାସ୍ଥ୍ୟ ଦିବସ ପାଳିତ ହୋଇଯାଇଛି। ସ୍ୱାସ୍ଥ୍ୟସେବା ଏବଂ ସାର୍ବଜନୀନ ସ୍ୱାସ୍ଥ୍ୟ ଉନ୍ନତିରେ ବୈଜ୍ଞାନିକ ପ୍ରଗତିର ଭୂମିକା ସମ୍ପର୍କରେ ଜନସାଧାରଣ ଓ ସ୍ୱାସ୍ଥ୍ୟକର୍ମୀଙ୍କ ମଧ୍ୟରେ ସଚେତନତା ସୃଷ୍ଟି କରିବା ଏହି କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ ଥିଲା। ଏହି ଅବସରରେ ଆୟୋଜିତ ଏକ ସ୍ୱତନ୍ତ୍ର ସେମିନାରରେ ପ୍ରତିରୋଧକ ସ୍ୱାସ୍ଥ୍ୟସେବା, ଟୀକାକରଣର ଗୁରୁତ୍ୱ ଏବଂ ସୁସ୍ଥ ଜୀବନଶୈଳୀ ଉପରେ ବିସ୍ତୃତ ଆଲୋଚନା କରାଯାଇଥିଲା।କାର୍ଯ୍ୟକ୍ରମରେ ବରିଷ୍ଠ ମଣ୍ଡଳ ଚିକିତ୍ସା ଅଧିକାରୀ ଡାକ୍ତର କେ. ସେଠି ସଭାକୁ ସମ୍ବୋଧିତ କରି ସ୍ୱାସ୍ଥ୍ୟସେବା ପ୍ରଦାନରେ ଆଧୁନିକ ବୈଜ୍ଞାନିକ ପଦ୍ଧତିର ପ୍ରୟୋଗ ଉପରେ ଆଲୋକପାତ କରିଥିଲେ।ସେହିପରି ନର୍ସିଂ ଅଧୀକ୍ଷିକା ଶ୍ରୀମତୀ ମମତା ସାହୁ ଏବଂ ଶ୍ରୀମତୀ ବର୍ଣ୍ଣାଲି ଦାସ ରୋଗୀ ସେବାରେ ଗୁଣାତ୍ମକ ମାନ ବଜାୟ ରଖିବା ପାଇଁ ପ୍ରମାଣିକ ଭିତ୍ତିରେ ଆଧାରିତ ଅଭ୍ୟାସର ଆବଶ୍ୟକତା ସମ୍ପର୍କରେ ନିଜର ମତ ଉପସ୍ଥାପନ କରିଥିଲେ। ମଣ୍ଡଳ ଚିକିତ୍ସା ଅଧିକାରୀ ଡାକ୍ତର ଆର୍.ଏନ୍. ପଣ୍ଡା ଏହି ସମ୍ପୂର୍ଣ୍ଣ କାର୍ଯ୍ୟକ୍ରମକୁ ସଂଯୋଜନା କରିଥିବା ବେଳେ ହସ୍ପିଟାଲର ସମସ୍ତ ଡାକ୍ତର ଓ ପାରାମେଡିକାଲ୍ କର୍ମଚାରୀମାନେ ଏଥିରେ ସକ୍ରିୟ ଅଂଶଗ୍ରହଣ କରି କାର୍ଯ୍ୟକ୍ରମକୁ ସଫଳ କରିଥିଲେ।
