ବୁଗୁଡ଼ାରେ ଡ୍ରେନ୍ ଅବରୋଧ ସମସ୍ୟା, ସାମାନ୍ୟ ବର୍ଷାରେ ଛକରେ ଜମୁଛି ପାଣି , ପ୍ରତିକାର ଦାବି

ବୁଗୁଡ଼ା, (ସୋରେନ କୁମାର ପ୍ରଧାନ):- ସ୍ଥାନୀୟ ମଦନ ମୋହନ ଛକ ସାମାନ୍ୟ ବର୍ଷାରେ ଜଳାର୍ଣ୍ଣବ ଯୋଗୁଁ ଯାତାୟାତରେ ଅସୁବିଧା ହେଉଥିବାରୁ ସାଧାରଣରେ ଅସନ୍ତୋଷ ଦେଖା ଦେଇଛି। ସହରର ସେହି ମୁଖ୍ୟ ଛକରେ ଜମୁଥିବା ପାଣି ଡ୍ରେନ ଅବରୋଧ ଯୋଗୁଁ ନିଷ୍କାସନ ହୋଇ ନ ପାରି ରାସ୍ତାରେ ଭାସୁଛି । ଅନ୍ୟପକ୍ଷରେ ବ୍ୟବସାୟୀମାନେ ନିଜର ସୁବିଧା ପାଇଁ ରାସ୍ତାକଡରେ ମାଟି ପକାଇ ଉଚ୍ଚା କରିଥିବାରୁ ରାସ୍ତାର ପାଣି ନିଷ୍କାସନ ହୋଇ ନ ପାରି ଛକରେ ଜମି ରହୁଥିବା ଫଳରେ ପଥଚାରୀଙ୍କ ପାଇଁ ସେହି ରାସ୍ତା ଉପଯୋଗୀ ହୋଇପାରୁ ନାହିଁ । ଏଥି ସହ ଜମୁଥିବା ପାଣି ଯୋଗୁଁ ସେହି ଛକରେ ଅନେକ ସମୟରେ ଟ୍ରାଫିକ ସମସ୍ୟା ମଧ୍ୟ ସୃଷ୍ଟି ହେଉଛି। ତେବେ ଏଥିପ୍ରତି ଏନ୍ଏସି କର୍ତ୍ତୃପକ୍ଷ ଦୃଷ୍ଟି ଦେଇ ବିହିତ ପଦକ୍ଷେପ ଗ୍ରହଣ କରିବା ପାଇଁ ସାଧାରଣରେ ଦାବି ହେଉଛି।