ଜାତୀୟ ହସ୍ତତନ୍ତ ଦିବସ ଅବସରରେ ଲକ୍ଷ ଲକ୍ଷ ସ୍ୱୟଂ ସହାୟକ ଗୋଷ୍ଠୀ ମହିଳା ସଦସ୍ୟଙ୍କ ସହ ଆଲୋଚନା କରିଛନ୍ତି କେନ୍ଦ୍ର ମନ୍ତ୍ରୀ ଶ୍ରୀ ଶିବରାଜ ସିଂହ ଚୌହାନ

“ହସ୍ତତନ୍ତ ଆତ୍ମନିର୍ଭରଶୀଳତାର ପ୍ରତୀକ; ଭାରତର ସ୍ୱାଧୀନତା ଆନ୍ଦୋଳନ ସମୟରେ ଏହା ଅହିଂସାତ୍ମକ ସଂଗ୍ରାମର ଏକ ଅସ୍ତ୍ର ମଧ୍ୟ ଥିଲା”-ଶ୍ରୀ ଶିବରାଜ ସିଂହ

ସ୍ୱୟଂ ସହାୟକ ଗୋଷ୍ଠୀ ମହିଳାମାନଙ୍କ ଉଲ୍ଲେଖନୀୟ ଦକ୍ଷତା ସ୍ଥାନୀୟ କଳା ଏବଂ ସଂସ୍କୃତିକୁ ପୁନର୍ଜୀବିତ କରିବାରେ ସହାୟକ ହୋଇଛି ବୋଲି ମନ୍ତ୍ରୀ ଉଲ୍ଲେଖ କରିଛନ୍ତି

“ରାଷ୍ଟ୍ର ପ୍ରଥମ; ସ୍ୱଦେଶୀ ସାମଗ୍ରୀ କୁ ଆପଣାନ୍ତୁ ଏବଂ ଜାତୀୟ ଗୌରବକୁ ସୁଦୃଢ଼ କରନ୍ତୁ’’ ବୋଲି ଆହ୍ୱାନ ଦେଇଛନ୍ତି ଶ୍ରୀ ଶିବରାଜ ସିଂହ ଚୌହାନ

ନୂଆଦିଲ୍ଲୀ: ଜାତୀୟ ହସ୍ତତନ୍ତ ଦିବସ ଅବସରରେ କେନ୍ଦ୍ର ଗ୍ରାମୀଣ ବିକାଶ ଏବଂ କୃଷି ଓ କୃଷକ କଲ୍ୟାଣ ମନ୍ତ୍ରୀ ଶ୍ରୀ ଶିବରାଜ ସିଂହ ଚୌହାନ ନୂଆଦିଲ୍ଲୀର କୃଷି ଭବନରୁ ଲକ୍ଷ ଲକ୍ଷ ସ୍ୱୟଂ ସହାୟକ ଗୋଷ୍ଠୀ (ଏସ୍ଏଚଜି) ମହିଳା ସଦସ୍ୟଙ୍କ ସହ ଭର୍ଚୁଆଲ ମାଧ୍ୟମରେ ମତ ବିନିମୟ କରିଥିଲେ। ଗ୍ରାମୀଣ ବିକାଶ ରାଷ୍ଟ୍ରମନ୍ତ୍ରୀ ଡକ୍ଟର ଚନ୍ଦ୍ର ଶେଖର ପେମ୍ମାସାନୀ, ଗ୍ରାମୀଣ ବିକାଶ ସଚିବ ଶ୍ରୀ ଶୈଳେଶ କୁମାର ସିଂହ ଏବଂ ଅନ୍ୟ ବରିଷ୍ଠ ଅଧିକାରୀମାନେ ମଧ୍ୟ ଉପସ୍ଥିତ ଥିଲେ।  

ଏହି କାର୍ଯ୍ୟକ୍ରମ ସମୟରେ, ବିଭିନ୍ନ ରାଜ୍ୟର ଏସ୍ଏଚଜି ମହିଳାମାନେ ଜାତୀୟ ଗ୍ରାମୀଣ ଜୀବିକା ମିଶନ (ଏନ୍.ଆର୍.ଏଲ୍.ଏମ୍.) ଯୋଗୁଁ ସେମାନଙ୍କ ଜୀବନରେ ସକାରାତ୍ମକ ପରିବର୍ତ୍ତନ ଉପରେ ଆଲୋକପାତ କରି ସେମାନଙ୍କ ଅଭିଜ୍ଞତା ବାଣ୍ଟିଥିଲେ। ସେମାନେ ଗୁରୁତ୍ୱାରୋପ କରିଥିଲେ ଯେ ଏହି ମିଶନ କେବଳ ଆର୍ଥିକ ସ୍ଥିରତା ପ୍ରଦାନ କରିନଥିଲା ବରଂ ସେମାନଙ୍କର ସାମାଜିକ ସ୍ଥିତିକୁ ମଧ୍ୟ ସୁଦୃଢ଼ କରିଥିଲା।

ଶ୍ରୀ ଚୌହାନ କହିଥିଲେ ଯେ ମହିଳାମାନେ ଶକ୍ତି ଏବଂ ସୃଜନଶୀଳତାର ପ୍ରତୀକ ଏବଂ ଏକଦା ଭାରତର ସ୍ୱାଧୀନତା ଆନ୍ଦୋଳନରେ ଏକ ଉପକରଣ ଭାବେ କାର୍ଯ୍ୟ କରିଥିବା ହସ୍ତତନ୍ତ ଆତ୍ମନିର୍ଭରଶୀଳତାର ପ୍ରତୀକ। ସେ ଗ୍ରାମୀଣ କାରିଗରମାନଙ୍କ “ଉଲ୍ଲେଖନୀୟ କଳାତ୍ମକତା” କୁ ପ୍ରଶଂସା କରିଥିଲେ, ଯାହା କେବଳ ଭାରତରେ ନୁହେଁ ବରଂ ସମଗ୍ର ବିଶ୍ୱରେ ସ୍ୱୀକୃତି ଅର୍ଜନ କରିଛି।

ସ୍ଥାନୀୟ କଳା ଏବଂ ସଂସ୍କୃତିକୁ ପୁନର୍ଜୀବିତ କରିବାରେ ଏସ୍ଏଚଜି ମହିଳାମାନଙ୍କ ଭୂମିକାକୁ ମନ୍ତ୍ରୀ ପ୍ରଶଂସା କରି କହିଥିଲେ ଯେ ସେମାନଙ୍କ ସୃଷ୍ଟି ଭାରତର ସାଂସ୍କୃତିକ ପରିଚୟର ଏକ ଗୁରୁତ୍ୱପୂର୍ଣ୍ଣ ଅଂଶ ଏବଂ ଲୋକ ପରମ୍ପରାକୁ ପ୍ରକାଶ କରିବାରେ ସହାୟକ ହୋଇଥାଏ। ସେ ବଜାର ବ୍ୟବସ୍ଥା ଏବଂ ବ୍ରାଣ୍ଡିଂ ସମ୍ବନ୍ଧରେ ମହିଳାମାନଙ୍କ ଦ୍ୱାରା ଉଠାଯାଇଥିବା ଚିନ୍ତାଧାରାକୁ ମଧ୍ୟ ସ୍ୱୀକାର କରିଥିଲେ ଏବଂ ଡିଜାଇନ୍-କେନ୍ଦ୍ରିତ ତାଲିମ ସମେତ ଦୃଢ଼ ପଦେକ୍ଷପ ପାଇଁ ସେମାନଙ୍କୁ ଆଶ୍ୱାସନା ଦେଇଥିଲେ। ସେ ଏସ୍ଏଚଜି ସଦସ୍ୟମାନଙ୍କୁ ପ୍ରତିଯୋଗିତାରେ ରହିବା ପାଇଁ ଉତ୍ପାଦର ଉଚ୍ଚ ଗୁଣବତ୍ତା ବଜାୟ ରଖିବା ସକାଶେ ପ୍ରୋତ୍ସାହିତ କରିଥିଲେ।

ଶ୍ରୀ ଚୌହାନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସ୍ୱଦେଶୀ (ଦେଶୀ) ଉତ୍ପାଦକୁ ଗ୍ରହଣ କରିବାକୁ ସମର୍ଥନ କରୁଥିବା ବାର୍ତ୍ତାକୁ ଦୋହରାଇ କହିଛନ୍ତି ଯେ ବ୍ୟକ୍ତିଗତ ମୂଲ୍ୟରେ ମଧ୍ୟ ଜାତୀୟ ସ୍ୱାର୍ଥରେ କୌଣସି ଆପୋଷ ବୁଝାମଣା କରାଯିବ ନାହିଁ। ‘ରାଷ୍ଟ୍ର ପ୍ରଥମ “କୁ ପ୍ରାଥମିକତା ଦେବା ଏବଂ ସ୍ଥାନୀୟ ଭାବେ ନିର୍ମିତ ସାମଗ୍ରୀକୁ ସମର୍ଥନ କରିବା ଲାଗି ସେ ନାଗରିକମାନଙ୍କୁ ଅନୁରୋଧ କରିଥିଲେ।

ଆର୍ଥିକ ସ୍ୱାଧୀନତା ହାସଲ କରୁଥିବା ସ୍ୱୟଂ ସହାୟକ ଗୋଷ୍ଠୀ ମହିଳାମାନଙ୍କ ବର୍ଦ୍ଧିତ ସଂଖ୍ୟାକୁ ପାଳନ କରି ଶ୍ରୀ ଚୌହାନ କହିଥିଲେ ଯେ ଏହି ଅଭିଯାନ ଅଧୀନରେ ଦେଢ଼ କୋଟିରୁ ଅଧିକ (୧୫ ନିୟୁତ) ମହିଳା ‘ଲଖପତି ଦିଦି “(ବାର୍ଷିକ ୧ ଲକ୍ଷ ଟଙ୍କାରୁ ଅଧିକ ଆୟ) ହୋଇଛନ୍ତି। ସରକାର ୨ କୋଟି ମହିଳା ଲକ୍ଷପତି କରିବା ସହିତ ଶୀଘ୍ର ୩ କୋଟିରେ ପହଞ୍ଚିବାର ଲକ୍ଷ୍ୟ ଦିଗରେ କାର୍ଯ୍ୟ କରୁଛନ୍ତି।

ସ୍ରୋତ:ପିଆଇବି